Compra d'Alaska

Cheque que sirvió de pagu de la compra d'Alaska polos Estaos Xunios, emitíu'l 1 d'agostu de 1868.

La Compra d'Alaska (Alaska Purchase) ye'l términu utilizáu pa denomar la compra d'Alaska polos Estaos Xuníos en 1867. L'Imperiu rusu, soberanu del territoriu, vendiolu por 7,2 millones de dólares d'Estaos Xuníos de 1867 (equivalentes a 132 millones de dólares de 2015). El 15 de mayu de 1867 el Senáu de los Estaos Xuníos ratificó un tratáu billateral que fora firmáu el 30 de marzu, y la soberanía d'Estaos Xuníos sobre Alaska fízose llegalmente efectiva el 18 d'ochobre.

Demientres la primer metá del sieglu XIX Rusia estableciera una presencia colonial en delles fasteres d'América del Norte, pero perpocos rusos tuvieran instaláose n'Alaska. Alexandru II de Rusia, qu'acababa de sufrir una derrota catastrófica na guerra de Crimea, entamó a valorar la posibilidá de vender les sos posesiones n'Alaska, considerando que, en cualquier guerra futura, sedría difícil defendeles del Reinu Xuníu. Con esti propósitu, y tres d'acabar la Guerra de Secesión d'Estaos Xuníos, entamaron les negociaciones ente'l secretariu d'Estáu William H. Seward y el diplomáticu rusu Eduard de Stoeckl, que llegaron a un alcuerdu pa la venta, que foi robláu'l 30 de marzu de 1867.

Cola compra EEXX consiguió facer medrar el so territoriu 1.518.800 km², con un coste de 0,02 dólares por acre. Les reacciones na opinión pública americana fueron mayormente positives, una y bones munchos creíen qu'Alaska había servir como base pa estender el comerciu del país n'Asia. Dellos oponentes, por embargu, llamaban la compra la "llocura de Seward" (Seward's Folly) o "la nevera de Seward" (Seward's Icebox), porque defendíen que'l país había mercáu tierra inservible. La mayoría de los colonos rusos colaron d'Alaska dempués de la compra, y Alaska caltuvo una población escasa y enforma dispersa hasta qu'entamó la fiebre del oru de Klondike, en 1896. Orixinalmente organizáu como Departamentu d'Alaska, el territoriu camudó'l so nome pol de Distritu d'Alaska en 1884 y pol de Territoriu d'Alaska en 1912. Convirtiose finalmente n'estáu en 1959.