Merci, Chérie
| "Merci, Chérie" | |
|---|---|
| Udo Yürqens, Udo Yürqens tərəfindən ifa olunmuş mahnı | |
| Janr | şanson |
| Dil | alman dili |
| Bəstəkar | |
| Sözlərin müəllifi | Udo Yürqens |
"Merci, Chérie" (hərf. "Sağ ol, əzizim") — Avstriya müğənnisi Udo Yürgens tərəfindən bəstələnmiş, sözləri isə özünə və Tomas Hörbigerə məxsus olan mahnı. Kompozisiya Lüksemburqda keçirilən Avroviziya Mahnı Müsabiqəsində Avstriyanı təmsil etmiş və ölkəyə bu yarışma tarixindəki ilk qələbəni qazandırmışdır.
Tarixi
[redaktə | vikimətni redaktə et]Yaradılması
[redaktə | vikimətni redaktə et]"Merci, Chérie" mahnısı Udo Yürgens tərəfindən, onun özünün və Tomas Hörbigerin sözlərinə bəstələnmişdir. Əsər, sevgilisi ilə vidalaşan müğənninin ona birlikdə keçirdikləri gözəl günlərə və xoş xatirələrə görə təşəkkür etməsindən bəhs edən təsirli bir ballada üslubundadır. [[Fransızca ifadələr özündə əks etdirən orijinal almanca versiyası ilə yanaşı, Yürgens bu mahnını tamamilə fransızca, ingiliscə, yaponca (メルシー・シェリー, "Merushī sherī"), italyanca (Vito Pallaviçininin mətni ilə) və ispanca (Arturo Kaps-Şönfeldin mətni ilə) da yazdırmışdır.)[1]
Avroviziya Mahnı Müsabiqəsi
[redaktə | vikimətni redaktə et]Avstriya Yayım Şirkəti (ORF) "Merci, Chérie" mahnısını 11-ci Avroviziya Mahnı Müsabiqəsində ölkəni təmsil etmək üçün seçmişdir.[2]
5 mart 1966-cı il tarixində Lüksemburqun Luvinyi villasında, "Compagnie Luxembourgeoise de Télédiffusion" (CLT) şirkətinin təşkilatçılığı ilə Avroviziya Mahnı Müsabiqəsi baş tutmuş və bütün qitədə canlı yayımlanmışdır. Yürgens həmin gecə, Portuqaliyanı təmsil edən Madalena İqlesiasın "Ele e ela" mahnısından sonra və İsveçi təmsil edən Lill Lindfors ilə Svante Turessonun "Nygammal vals" mahnısından əvvəl səhnəyə doqquzuncu sırada çıxmışdır. Avstriya təmsilçisinin çıxışı zamanı orkestri Hans Hammerşmid idarə etmişdir.[3]
Səsvermənin yekunlarına əsasən, "Merci, Chérie" mahnısı 31 xal toplayaraq on səkkiz iştirakçı arasında birinci yeri təmin etmişdir.[4] Bu, Avstriyanın "Avroviziya"dakı ilk qələbəsi olmuş və ölkə növbəti qalibiyyətini yalnız 2014-cü ildə Konçita Vurstun ifa etdiyi "Rise Like a Phoenix" mahnısı ilə qazanmışdır. 2025-ci ilə olan məlumata görə, bu kompozisiya müsabiqədə böyük ölçüdə və ya tamamilə almanca ifa olunaraq qalib gəlmiş iki mahnıdan biridir. Digər almandilli qələbə 1982-ci ildə Almaniyanı təmsil edən Nikolun ifasındakı "Ein bißchen Frieden" bəstəsinə məxsusdur. Yürgens Dunkan Lourensin 2019-cu ildə "Arcade" mahnısı ilə qazandığı qələbəyə qədər yarışmada birinci olan sonuncu solo pianoçu-ifaçı kimi tarixə düşmüşdür.
1967-ci ildə Böyük Britaniyanı təmsil edən Sendi Şounun "Puppet on a String" mahnısı müsabiqənin qalibi olmuş, həmin il Avstriyanı isə Piter Hortenin ifasında "Warum es hunderttausend Sterne gibt" bəstəsi təmsil etmişdir.
İstinadlar
[redaktə | vikimətni redaktə et]- ↑ ""Merci, Chérie" lyrics and detailed info". The Diggiloo Thrush. 5 may 2023 tarixində arxivləşdirilib. İstifadə tarixi: 8 iyun 2026.
- ↑ "National Selections: 1966". Eurovisionworld. 13 may 2026 tarixində arxivləşdirilib. İstifadə tarixi: 8 iyun 2026.
- ↑ Eurovision Song Contest 1966 // Eurovision Song Contest. 5 mart 1966. CLT / EBU.
- ↑ "Official Eurovision Song Contest 1966 scoreboard". Eurovision Song Contest. 7 aprel 2021 tarixində arxivləşdirilib. İstifadə tarixi: 8 iyun 2026.
