Vai al contenuto

Tim Robbins

Da Wikipedia.

C'l artìcul chè 'l è scrit in Miranduléś Emiliàn

Robbins tòlt śò in dal 2008


Timothy Francis Robbins, cgnusû méj cuma Tim Robbins (West Covina, 16 'd Utóbar dal 1958), 'l è 'n atōr, regìsta e senegiadōr americàṅ, vinsidōr dal Prèmi Òscar in dal 2004 cuma atōr minga prutagunìsta p'r al film Mystic River ad Clint Eastwood.

In dal 1999 'l à dâ la sò vōś a 'n persunàǵ di The Simpsons.

Biugrafia

Fiōl dna famìja catòlica cun di urìgini irlandéśi, Tim al crés in Califòrgna e pò a dód'ś an al taca a recitàr a New York in na cumpagnìa teatràla 'd avanguàrdia ciamàda “Theater for the New City”. In séguit al và a star a Los Angeles in dua 'l taca a studiàr a l'università dla Califòrgna faghénd al camarēr par pagàr-'s i cōrs, laureànd-as pò in dal 1981.

In di an Utànta al taca a tōr part a dal prudusiòṅ televiśìvi, cuma Hardcastle & McCormick e Storie incredibili, e a recitàr in soquànti pelìculi cuma Sacco a pelo a tre piazze, cumèdia ad Rob Reiner, Top Gun, in dua 'l lavóra cun Tom Cruise faghénd la part dal tenènt Wells, e Howard e il destino del mondo, un nàdar trat da 'n fumét dla Marvel Comics.

Robbins a Turònt in dal 2012
John Edwards, la Sarandon e Robbins
Tim a na manifestasiòṅ dal 2007 cóntar la guèra in Iràq

In dal 1988 cun Bull Durham - Un gioco a tre mani al gh'à 'l sò prim rōl impurtànt a 'l cìnema. Su 'l set al lavóra cun Kevin Costner e la Susan Sarandon ch'la dvènta la sò muróśa, armagnénd sèg par vint-i-òṅ an, in fiṅ a 'l 2009, dand-'g anc dū fiōi masć.

In di an Nuànta al lavóra par tri vòlti in film ad Robert Altman: in dal 1992 cun I protagonisti al vins al prèmi par la sò part da prutagunìsta a 'l 45śum Fèstival ad Cannes, in dal 1993 cun America oggi, Lèòṅ 'd Òr a 'l 50śum Fèstival ad Venèsia e in dal 1994 cun Prêt-à-Porter, in dua 'l è òṅ di prutagunìsta 'd un cast ad stéli.

In dal 1992 al fà anc al sò debùt a la regìa cun Bob Roberts, un ducumentàri fals su 'n candidâ pupulìsta e cunservadōr a 'l Senàt di Stat Unî. In dal 1994 'l è prutagunìsta dla pelìcula candidàda a i Prèmi Òscar Le ali della libertà, trata da na stòria 'd Stephen King.

In dal 1995 al gira Dead Man Walking - Condannato a morte, un film trat da na stòria véra su 'n cundanâ a mòrt, cun prutagunìsta la Susan Sarandon, premiàda cun 'n Òscar, e Sean Penn, sōl numinâ.

In dal 2000 Brian De Palma 'l al sarnìs par la part dal cmandànt Woody Blake in Mission to Mars.

Puśisiòṅ pulìtichi

Cuma sustenidōr dal pulìtichi 'd sinìstra, in dal 2000 'l à dâ 'l sò apòǵ a 'l candidâ di vérd Ralph Nader cóntar George W. Bush e Al Gore. In dal 2007 al s è mis da la part dal senadōr demuctàtic dla Carulìna dal Nòrd John Edwards in dla sò cursa a gl'Elesiòṅ presidensiàli dal 2008. Par la campàggna dal 2016, durànt un dascōrs par Bernie Sanders, 'l à mòs dal crìtichi a l'Hillary Clinton. In dal 2023 al s è mis cónt'r a 'l puśisiòṅ dal guèran su 'l COVID-19, esénd lò cuntràri a i bloc.

Filmugrafìa

cuma atōr

cuma regìsta

Culegamènt estéran

Àtar prugèt

Estratto da "https://eml.wikipedia.org/w/index.php?title=Tim_Robbins&oldid=159615"