Glen Hansard

Glen Hansard
	; (2016) Irudi gehiago
Bizitza
Jaiotzako izen-deiturak	Glen James Hansard
Jaiotza	Dublin, 1970eko apirilaren 21a
Herrialdea	Irlandako Errepublika
Lehen hizkuntza	ingelesa
Heriotza	Dublin, 2026ko uztailaren 29a (56 urte)
Heriotza modua	istripuzko heriotza: trafiko-istripua
Familia
Ezkontidea(k)	Maire Saaritsa (en) (2022 - 2026ko uztailaren 29a)
Bikotekidea(k)	ikusi Markéta Irglová;
Hezkuntza
Heziketa	New York Film Academy (en)
Hizkuntzak	ingelesa; nederlandera
Jarduerak
Jarduerak	aktorea, kale-artista, abeslaria, egile abeslaria, musikaria, soinu banda konpositorea, zinema aktorea, gitarra-jotzailea, konpositorea, kanta-idazlea eta rock musician (en)
Lantokia(k)	Dublin
Jasotako sariak	ikusi Jatorrizko abesti onenaren Oscar Saria ;
Kidetza	The Frames (en) ; The Swell Season; Interference
Genero artistikoa	herri-musika; Indie popa; contemporary folk music (en) ; rock; folk rock; indie folk (en) ; indie rock
Ahots mota	baritonoa
Musika instrumentua	ukelelea; ahotsa; gitarra
	glenhansard.com

Glen James Hansard (1970eko apirilaren 21a, Ballymun, Dublin – 2026ko uztailaren 29a^[1]), irlandar kantautorea, abeslaria eta musikaria izan zen, 1990 urtetik aurrera The Frames rock taldearen abeslaria izandakoa. Dublinen hil zen, 56 urte zituela, Strawberry Beds eremuan, motorrarekin izandako istripu batean.

Biografia

1970ean jaio zen Dublinen. Hamahiru urterekin eskola utzi eta hiri erdiko Grafton Street kalean jotzen zuen gitarra, lagun talde batekin. 1991n Alan Parkerren The Commitments pelikulan Outspan Foster gitarra-jotzailearen papera antzeztu ondoren lortu zuen lehendabiziko ospea. Garai berean The Frames taldea sortu zuen. Taldeak arrakasta handia izan zuen Irlandako rock alternatiboaren esparruan 1990eko hamarkadan eta 2000ko hamarkadaren hasieran, "Revelate" edo "Star Star" bezalako kantu ezagunei esker.^[2]

Nazioarteko ospea 2007an iritsi zitzaion, John Carney zuzendariaren Once film independentean protagonista gisa parte hartu zuenean. Hansardek eta Markéta Irglová kideak konposatutako soinu-bandak harrera bikaina izan zuen, eta "Falling Slowly" baladak Jatorrizko Abesti Onenaren Oscar saria eman zieten 2008an. Saria jasotzeko orduan emandako hitzaldiak laburbildu zuen bere filosofia: «Izan zaitezte ausartak, jarraitu amesten». Horren ostean, ‘The Swell Season’ proiektua bultzatu zuen eta bakarkako ibilbide sendoa garatu zuen, Europan zehar eta AEBn bira ugari eginez.^[2]

Maire Saarista finlandiar olerkariarekin ezkonduta zegoen eta seme gazte bat zuen. Gizarte-ekimenetan parte hartzeagatik ere bazen ezaguna. Azken 15 urteetan, Gabon gauean Simon Community erakundearen aldeko diru-bilketak sustatu zituen Dublingo kaleetan, beste musikari batzuekin batera. Halaber, 2016an etxerik gabeko pertsonei babesa emateko Apollo House eraikinaren okupazioa publikoki babestu zuen.^[2]

Azken asteetan, Hansardek ‘High Hope’ single berria kaleratu zuen eta uztailean bertan kontzertua eman zuen Dublingo Trinity Summer Series zikloan.^[2]

Heriotzari erreakzioak

Bere heriotzaren berri jakin ondoren, herrialdeko kultura arloko hainbat pertsonaiak eta ordezkari politikok Irlandako musikan utzitako ekarpena nabarmendu dute. Catherine Connolly Irlandako presidenteak saminez gogoratu du: «Glen Irlandako musikaren munduko eragile nagusietako bat izan zen, jendea zuzeneko musikaren inguruan biltzen zuena. Asko botako dute faltan bera ezagutu zutenek, baita bere lana ezagutu zuten guztiek ere». Nazioartetik, besteak beste, Bruce Springsteenek mezua zabaldu zuen sareen bidez: «Hemen, E Streeten, bihotza hautsita dugu Glen Hansarden heriotzagatik. Duela urte asko ezagutu genuen elkar Irlandan, eta beti izan zen musikari bikaina, lagun ona eta gizon eskuzabal nahiz atsegina».^[2]