Erling Haaland
Erling Braut Haaland, tamén escrito Håland, nado en Leeds o 21 de xullo de 2000, é un futbolista noruegués. Xoga como dianteiro no Manchester City da Premier League e na selección de Noruega. Considerado un dos mellores xogadores do mundo e o mellor futbolista noruegués de todos os tempos, destaca pola súa velocidade, forza, e finalización dentro da área.
Fillo do internacional noruegués Alf-Inge Håland, formouse na canteira do Bryne, debutando co primeiro equipo en 2016, con só 15 anos. En 2017 fichou polo Molde onde pasou dous anos, ata que en xaneiro de 2019 asinou co Red Bull Salzburg, gañando dous títulos da Bundesliga austríaca e unha Copa de Austria. En decembro de 2019 foi traspasado ao Borussia Dortmund, no que militou dúas campañas e media, gañando a Copa de Alemaña na tempada 2020/21.[1] No verán de 2022 fichouno o Manchester City de Pep Guardiola e conquistou un triplete na súa primeira campaña, sendo elixido mellor xogador da Premier League e establecendo o récord de maior número de goles anotados nunha mesma tempada da competición, con 36.
Ao longo da súa carreira gañou numerosos premios individuais e rompeu varios récords. Na Liga de Campións da UEFA 2019/20, converteuse no primeiro futbolista de menos de 20 anos en marcar en cinco partidos consecutivos da Liga de Campións e no segundo en marcar 10 goles na competición. En 2020 recibiu o premio Golden Boy, mentres que en 2021 foi elixido mellor xogador da Bundesliga Co Manchester City superou varios récords da Premier League, entre eles o de xogador con maior número de goles nunha tempada, xogador que menos tempo precisou para marcar dous, tres e catro tripletes, e converteuse no único futbolista da historia da liga en marcar tres tripletes en tres partidos consecutivos na casa.
Foi internacional con Noruega en varias categorías inferiores e na Copa do Mundo sub-20 de 2019 gañou a Bota de Ouro despois de marcar a cifra récord de nove goles nun mesmo partido. En setembro de 2019 debutou coa selección de Noruega absoluta, e en 2024, con só 24 anos, superou os 33 goles de Jørgen Juve como o máximo goleador histórico do país, marca que levaba vixente 87 anos.
Palmarés
[editar | editar a fonte]- Red Bull Salzburgo
- Bundesliga de Austria (2): 2018/19, 2019/20.
- Copa de Austria (1): 2018/19.
- Borussia Dortmund
- Copa de Alemaña (1): 2020/21.
- Manchester City
- Premier League (2): 2022/23, 2023/24.
- FA Cup (1): 2022/23.
- FA Community Shield (1): 2024.
- Liga de Campións (1): 2022/23.
- Supercopa de Europa (1): 2023.
- Individual
- Bota de Ouro (1): 2022/23.
- Bota de Ouro da Premier League (1): 2022/23.
- Golden Boy (1): 2020.
- Máximo goleador da Liga de Campións (1): 2020/21.
- Futbolista do Ano en Austria (1): 2019.
- Xogador do Ano da Premier League (1): 2022/23.
Notas
[editar | editar a fonte]- ↑ "Dortmund sign Haaland from Salzburg". BBC Sport (en inglés). Consultado o 2023-01-07.
Véxase tamén
[editar | editar a fonte] |
Wikimedia Commons ten máis contidos multimedia na categoría: Erling Haaland  |
| Control de autoridades |
|
|---|
- Nados en 2000
- Nados en Leeds
- Futbolistas de Noruega
- Futbolistas de Inglaterra
- Dianteiros de fútbol
- Xogadores do Bryne FK
- Xogadores do Molde FK
- Xogadores do Red Bull Salzburg
- Xogadores do Borussia Dortmund
- Xogadores do Manchester City FC
- Xogadores da selección de fútbol de Noruega
- Futbolistas gañadores da Liga de Campións da UEFA
- Xogadores do Mundial de Fútbol de 2026
