As mialxias[1] ou dores musculares consisten en dores ou molestias que poden afectar a un ou varios músculos do corpo. Tamén poden estar implicados ligamentos, tendóns e fascias. As causas son moi variadas. As principais inclúen sobrecarga, tensión ou lesións musculares por exercicios ou traballos físicos intensos. Así mesmo, a dor muscular pode ser un síntoma de certas doenzas que afectan a todo o corpo, entre as cales destaca a fibromialxia.[2]
As causas máis frecuentes de mialxia son o sobreesforzo muscular, especialmente cando se realizan contraccións moi rápidas sen quecemento previo ou moi repetitivas, e as lesións ou os traumatismos sobre os músculos, incluíndo escordaduras e distensións.[2] A tensión tamén pode ocasionar dor muscular.[2]
