Ѵ

Ѵ ѵ (ižica) je bukva starokiriličnoj azbuky, ktora služila kako ekvivalent grečskoj bukvy upsilon (Υ, υ) v slovah i imenah grečskogo proizhodžen‌ja. Zavisno od pozicije ona izgovarjala se kako [i] (napr. Кѵрилъ, сѵнодъ) ili [v] (napr. Паѵелъ), to znači identično bukvam и ili в. Akcentovana ižica je samoglaska izgovorjena kako [i], ižica bez diakritičnyh znakov je suglaska izgovorjena kako [v]. Neakcentovana ižica s izgovorom [i] imaje specialny diakritičny znak, tako nazyvajema kendema, ktora izgledaje kako dvojny gravis ili dvojny akut: Ѷ, ѷ (napr. Сѷріꙗ). Poněkogda ižica takože pojavjaje se zaměsto у v kombinaciji оѵ [u].

Pod titlom ižica prědstavjaje starokirilično čislo 400.

Zatože ižica ne iměla vlastny izgovor, ona brzo stala izbytočna i upotrěbjala se vse rěděje. V russkom bylo na početku 20. stolětja samo jedno slovo s ižiceju: мѵро (za odličen‌je od slova миръ), poslě 1918 ona izčeznula definitivno. Iz srbskogo pravopisa ižica byla udaljena na početku 19. stolětja pri reformu Vuka Karadžića. V rumunskoj kirilici ižica byla upotrěbjena do ok. 1860 g. Nyně ona upotrěbjaje se samo v crkovnoslovjanskom jezyku.

Kodovan‌je

Kodovan‌je		Ѵ	ѵ	Ѷ	ѷ
Nazva v Unikodu		CYRILLIC CAPITAL LETTER IZHITSA	CYRILLIC SMALL LETTER FITA	CYRILLIC CAPITAL LETTER IZHITSA WITH DOUBLE GRAVE ACCENT	CYRILLIC SMALL LETTER FITA WITH DOUBLE GRAVE ACCENT
Unikod	šestnadseterična sistema	U+0474	U+0475	U+0476	U+0477
	deseterična sistema	1140	1141	1142	1143
HTML	šestnadseterična sistema	Ѵ	ѵ	Ѷ	ѷ
	deseterična sistema	Ѵ	ѵ	Ѷ	ѷ
UTF-8		D1 B4	D1 B5	D1 B6	D1 B7

Vněšnje linky

• "U+0474 Cyrillic Capital Letter Izhitsa". codepoints.net (na anglijskom).
• "U+0475 Cyrillic Small Letter Izhitsa". codepoints.net (na anglijskom).
• "U+0476 Cyrillic Capital Letter Izhitsa with double grave accent". codepoints.net (na anglijskom).
• "U+0477 Cyrillic Small Letter Izhitsa with double grave accent". codepoints.net (na anglijskom).