nasin sewi Isilan

kepeken pi jan mute la ni li sitelen pi nasin sewi Isilan.

tomo Kapa pi ma Maka.

nasin sewi Isilan (toki Alapi la: الإسلام /al.ʔis.laːm/) anu nasin sewi Isilami anu nasin sewi Silami anu nasin sewi Ilan anu nasin sewi pi jan Muwama li tan ma Alapi. mama sewi li wan taso. jan Muwama li jan sewi suli lon nasin ni li pana e sona pi sewi ni. toki Alapi la nimi sewi li nimi Olo.

nasin sewi ale la mute jan pi nasin Isilan li suli nanpa tu. ona li nasin sewi pi jan Alawan. mama sewi li toki e sona tawa jan Muwama la, ona li kama lipu e sona lon lipu Kulan. ni li lawa e nasin. nasin Isilan la, sewi Olo li pini e toki ona ni la, toki sewi sin li kama ala. jan Muwama la, jan Alawan en jan Jesu li jan pi toki ante lon tenpo pini.

nasin Suni en nasin Sija li tu suli ona. nasin mute ante kin li lon li lili tawa ona tu.

sona

nasin Suni en nasin Sija la toki ni li pona li lon. ijo li wile kama lon nasin Isilan la ona o toki lon e sona ni:

1. wan sewi
2. jan sewi
3. lipu sewi
4. jan pi kute sewi
5. tenpo sewi pi moli ale
6. lawa sewi pi pali ale

wan sewi

sewi li ijo wan lon nasin Isilan. nasin ante pi jan Jesu la sewi li mute la ona li mama wan li jan wan li kon wan. ni li lon ala nasin Isilan.

sewi li sijelo ala li jan ala li ijo ma ala la sitelen pi sewi wan li ken ala lon nasin Isilan.

jan sewi

sewi li lawa e jan sewi ni li pana e sona tawa jan pi kute sewi kepeken ona. sewi li pali e ona kepeken suno la ona li ken ala ike. ona li sona e ijo ale.

lipu sewi

lipu Kulan li tan toki pi jan Muwama. sewi li toki tawa ona kepeken jan suno sewi. jan poka kin pi jan Muwama li toki e sona sewi la mute li pali e lipu Asi^(?) (toki Alapi la: الحديث النبوي, "lipu pi toki sewi kama")

tenpo sewi pi moli ale

nasin Isilan la tenpo kama la ale li moli lon tenpo sama li ken tawa ma pona li ken tawa ma ike.

lawa sewi pi pali ale

sewi li lawa e pali ale lon. taso jan li ken wile ante. sewi li lawa e ken ni.

nasin Suni en nasin Sija

nasin Suni (Sunni) li loje. ona li jelo la nasin Suni li lili. nasin Sija (Shia) li laso.

nasin Isilan li tu tan ni: toki pi jan mute la jan Muwama li moli la kulupu o anu e jan lawa sin li wile e jan Apu Pa. ni li kama nasin Suni. taso mute ante li toki e ni: jan Muwama li moli la ona li toki e ni: jan pi kulupu mama ona o lawa la jan Ali o ni. ni li kama nasin Sija. kulupu tu ni li kama utala la ante mute kin li kama lon tenpo.

nasin Suni en nasin Sija la nasin Suni li suli li lon ma mute. nasin Sija li suli lon lawa pi ma Ilan li nasin pi suli nanpa wan lon ma Ila kin lon ma Asepasan kin. ma Lunpan en ma Palen en ma Kuwe en ma Jemen la nasin tu li suli.

ma Oman la nasin lawa li nasin Ipasi. ni li sama ala nasin Suni li sama ala nasin Sija. nasin Suni kin li suli lon ma Oman.

kulupu pi nasin Suni

nasin Suni la nasin sewi suli tu wan en nasin lawa suli tu tu li lon. nasin sewi suli li nasin Atali li nasin Asali li nasin Matulisi. nasin lawa suli li nasin Sapiwi li nasin Maliki li nasin Anapi li nasin Anpali.

nasin sewi la nasin Asali li suli nanpa wan. nasin Matulisi li nanpa tu. nasin Atali li lili. nasin lawa la nasin Anapi li suli nanpa wan. nasin Maliki li nanpa tu. nasin Sapiwi li nanpa tu wan. nasin Anpali li lili mute. taso nasin sin Wawapi li suli e ona lon ma Sajusi lon ma Kata lon tenpo poka.

kin la nasin lawa Sawili li lon li poka tawa moli. suli la ona li ijo pi tenpo pini. taso jan lawa Atala pi ma Utun li pana e toki ona^(?) la ona li toki e nasin lawa suli tu tu e nasin lawa tu pi nasin Sija e nasin Ipasi e nasin Sawili kin.

mute la jan pi nasin lawa Anapi li kepeken nasin sewi Matulisi. mute la jan pi nasin lawa Sapiwi en jan pi nasin lawa Maliki li kepeken nasin sewi Asali. mute la jan pi nasin lawa Anpali li kepeken nasin sewi Atali.

nasin nasa Supi kin li lon li nasin lawa ala li nasin sewi ala. ona li alasa pilin e sewi.