يبقى عدى سنه كامله على وفاته , بالنسبه ليا عدى عليها 17سنه و5شهور و3 ايام اللى هو عمرى لحد دلوقتى.
كنت فاكره انى بمرور الوقت هقدر انسى الحنان اللى ما عشتهوش ، والحب اللى مالقيتهوش،وربنا يخليلى ماما بس حنان الاب من نوع تانى مختلف..بس مع مرور الوقت بحس اكتر انى عاوزه اشوفه
وقت ماعرفت بخبر وفاته يمكن ما كنتش مستوعبه ،مات ،مش هشوفه طب مانا كده كده مش بشوفه ،كنت زعلانه بس ماكنتش مستوعبه
مع مرور الوقت بدات استوعب يعنى ايه مات ،وايه الفرق ،اكتشفت انه كان عايش وانا مش بشوفه بس كان عندى امل كبير انى هشوفه وكنت ناويه ان اول الامتحانات ماتخلص هروح واشوفه حتى لو بدون رغبته او رغبه اى حد ..
بس دلوقتى استوعبت انى مستحيل اشوفه ومستحيل اكلمه ومستحيل اعرف اجابة مليووون سؤال نفسى اعرف لهم اجابه وللاسف ما حدش يقدر يقولى غيره تفسير تصرفات كتيير عملها
نفسى اقوله وحشتنى اوى بس مش انت اللى وحشتنى اللى وحشنى هو الاب اللى كان نفسى فيه
يمكن لو كان عندى اخ كان الموضوع بقى اسهل عليا شويه
بس للاسف ماليش اخوات ولاد وحاسه انى لوحدى
صعب عليا انى اقولها وانت يا بابا اللى خلتها صعبه اوى بس ماقدرش اقول غيرها :الله يرحمك
