Elisha Cuthbert

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Elisha Ann Cuthbert (nassùa a Calgary, Alberta, Canadà, ël 30 ëd novèmber dël 1982) a l'é n'atris canadèisa.

A l'é dventà famosa a livel antërnassional për sò ròl ëd Kim Bauer ant la serie televisiva 24 (2001-2010). A l'ha peui otnù 'l sucess con la comedia adolessensial La fija d'acant (The Girl Next Door, 2004) e con ël film d'oror La ca 'd sira (House of Wax, 2005).

Biografìa

Elisha Cuthbert a l'é fija ëd Kevin, n'angigné d'assistensa, e 'd Patricia, na mare 'd famija. A l'ha un frel pì giovo (Jonathan) e na seure (Lee-Ann). A l'é chërsùa a Greenfield Park, an Québec, ant na famija anglòfona. A l'ha studià a la Centennial Regional High School e a l'é peui tramudasse a Los Angeles a 17 agn.

Dël 2013 a l'ha marià ël giugador d'hockey su giassa Dion Phaneuf. La cobia a l'ha doi fieuj: na fija nassùa dël 2017 e 'n fieul dël 2022.

Cariera

J'inissi (1996-2000)

A l'ha ancaminà soa cariera da masnà, an fasend la modela për vestimenta për cit a 9 agn. A 14 agn a l'ha debutà ant ël cine con ël film Dancing on the Moon (1997). Ant l'istess perìod a l'ha co-presentà ël programa Popular Mechanics for Kids (1997-2000), un documentari educativ ch'a l'ha fàit an manera che la prima dama Hillary Clinton a l'invitèissa a la Ca Bianca. A l'ha 'dcò avù un ròl ant la serie Are You Afraid of the Dark? (1999-2000).

Dël 2001 a l'ha vagnà sò prim Premi Gemini (l'equivalent dël Premi Emmy an Canadà) për soa interpretassion ant ël telefilm Lucky Girl.

La fama con "24" e ij film dël sucess (2001-2010)

La svolta a l'é rivà dël 2001 cand a l'é stàita sernùa për la part ëd Kim Bauer, la fija dël protagonista Jack Bauer (Kiefer Sutherland), ant la serie d'assion 24. La serie a l'ha avù un gran sucess e Cuthbert a l'é stàita nominà për doi Screen Actors Guild Award ansema al cast.

Ant l'istess perìod a l'ha recità an doi film comédia: Old School (2003) e Love Actually (2003). Dël 2004 a l'ha otnù 'l ròl dla Danielle, n'ex-star pornogràfica, ant la comedia La fija d'acant (The Girl Next Door). Për costa inpretassion a l'é stàita nominà a j'MTV Movie Awards coma Mija arvelassion e Mijor Basin. Dël 2005 a l'ha protagonisà 'l film d'oror La ca 'd sira (House of Wax), ch'a l'ha confermà sò stat ëd sex symbol e scream queen (regin-a dël crij). A l'ha vagnà doe nominassion ai Teen Choice Award.

A l'ha 'dcò prodovù e recità ant ël drama The Quiet (2005). Dël 2007 a l'é stàita protagonista dël thriller Captivity e dël drama He Was a Quiet Man.

Anliure