Sámis ellet searas áhkut. Gáregasnjárgga bálvalandálus oroda Ohcejoga gieldda boarrásamos ássi Čiskke Niillasa Ánne, Anne Kirsten Pajuranta. Son fárrii bálvalandállui njukčamánus 2024.
– Dáppe lea buorre, dadjá son duđavaččat.
Pajuranta devddii geassit 100 jagi, muhto ii leat ieš olus smiehtastange man guhkes áigi dat lea.
– Ii moktiige. Beaivi go beaivi. Go ii leat buohcci, dat ii dieđe mastige. Livčče buohcamin de dat gal dieđášii. Go dearvvas lea de manná beaivi nu hoahpus, hoahkala Pajuranta.
Su vánhemat ja isitge gerge maid eallit guhkes eallima. Čiskke Niillas elii maid badjel 100-jahkásažžan ja Pajuranta eadni Bienne Per Elle fas badjelaš 90-jahkásažžan. Isit Niillasaš Ovllá Ovllá, Uula Pajuranta gearggai maid eallit measta 95-jahkásažžan ovdal go vádjolii 15 jagi dassái.
97-jahkásaš Karoliina Nuorgam dálostallá ain iežas ruovttus
Olles Suomas leat statistihkaid mielde sullii 14 000 badjel 95-jahkásačča.
Sámegielddain Ohcejogas, Anáris ja Eanodagas elle jagi 2024 loahpas stáhtistihkaguovddáža dieđuid mielde sullii moaddelot badjel 95 jahkásačča. Eatnašat sis Anáris.
Máŋgasat boarrásiin ellet vel iežaset ruovttuin dego 97-jahkásaš Iiddá Niillasa Karoliinná, Karoliina Nuorgam Gámasmohkis. Sus leat mánát veahkkin juohke beaivve, go su nieiddat Signe ja Selma Nuorgam leaba dálostallan suinna.
– Mun lean vehá boaris muhto ii veaje. Mus leat buorit goahkat leamaš. Mun álggos go okto báhcen, de Signe lei guhkesáigge mu goahkkan. Dál lea fas álgán dáppe johtit ja Selma lea fárren deike, muitala Nuorgam.
Sus ásset maid golbma bártni ránnjás ja dievva áhkkubat lahkosis. Okto son ii dárbbaš láittastuvvat.
– Hárjánan álo boahtit deike guossái, muitala Nuorgam.
Beaividuvvon 8.10.2025 diibmu 11.00: lasihuvvon Karoliina Nuorgam govva.
Beaividuvvon 8.10.2025 diibmu 11.50: lasihuvvon video.
