Aanaarlâš Anne Seipiharju lijjii mieldi väldimin vuástá tiäđualmostittem staatâpalhâšume, mii adelui Wikimedia Suomi -siärván. Seipiharju lii paijeel kuttâ ive porgâm já čáállám anarâškielâlij Wikipediast.
Wikimedia Suomi rs lii servi, moin ohtsâšpargoost rijjâtátuliih ulmuuh rähtih Wikipedia-artikkâlijd. Wikipedian čäälih meid sämikielâlijd artikkâlijd.
Palhâšume miäruštâlmijn mainâšui meid sämikielah. Miäruštâlmij mield loveh tuhâtteh syemmiliih wikipedistih láá porgâm eromâšávt suomâ- já ruotâkielâg sehe orjâlâš- já anarâškielâg Wikipediai oovdân. Meiddei eŋgâlâskielâg Wikipedia já eres kielâversioh liččii ereslágáneh, jis iä liččii syemmiliih čälleeh.
Seipiharju lâi moovtâ, ko servi halijdij suu fáárun väldiđ palhâšume vuástá.
– Lâi hirmâd stuorrâ kunnee, et toh koijâdii muu mieldi väldiđ palhâšume vuástá oovtâst saavâjođetteijein, Seipiharju áávvud.
Sun lii eromâš ilolâš meid tast, et Suomâ staatâ lii huámášâm ulmui pargo. Stuárráámus uási wikipedistijn láá rijjâtátuliih.
Wikipedisti pargo mield piäsá maaŋgâpiälálávt kevttiđ kielâ
Anne Seipiharju movtáskij porgâđ wikipedistin ive 2019.
– Enâmustáá lam porgâm teknisijd aašijd, mut tiäđust-uv meid čáállám artikkâlijd. Lam meiddei jurgâlâm kevttimloovtâ tobbeen já tien tiegárijd aašijd, sun iätá.
Seipiharju rasa suotâsvuotâ tiet anarâškielâg Wikipedia oovdân. Suu mield tot váldá ton mield äigi ko toos haalijd adeliđ.
– Ijhân kihheen ohtuu poorgâ Wikipedia, Seipiharju čielgee.
Taan ääigi Wikipedia anarâškielâlii versiost láá muádlov aktiivlâš kevtted.
Nuorttâlâš- já orjâlâškielâg Wikipediah aibâšeh rähteid
Anarâškielâg wikipedistih láá eenâb ko orjâlâš- tâi nuorttâlâškielâg. Seipiharju mield orjâlâškielâg Wikipedia lii, mut tobbeen iä lah taan ääigi aktiivlijh kevtteeh.
Nuorttâlâškielâg Wikipedia lii láláttuvâst, ađai taggaar Wikimedia inkubaattorist, kost Wikipediah láá ovdil ko toh šaddeh olmâ Wikipedian. Keevâtlávt tast lii valmâš vuáđu, mut kevtteeh váilojeh.
– Jis kávnojeh kevtteeh, kiäh láá movtáskem čäälliđ já rähtiđ aašijd tobbeen, te lii máhđulâšvuotâ šoddâđ mottoom peeivi olmâ Wikipedian, Seipiharju huámášit.
Sun lii vaalmâš išediđ ulmuid, kiäh sátáččii leđe perustum rähtiđ artikkâlijd tâi eres tiäđuid sämikielâg Wikipediaid.
– Ij taarbâš mättiđ maiden teknisijd hommáid. Ko čáálá já lii mottoom käldee, et kost tot tiätu puátá, te tot lii tuárvi.
Tieđâ- já kulttuurminister Mari-Leena Talvitie juovij čiččâm staatâpalhâšume merhâšittees tiäđualmostittempargoost 8. kesimáánu Oulust.
Meiddei Sämmilij tuotâvuotâ- já sovâdâttâmkomissio komissaareh ožžuu staatâpalhâšume.
Tiivvum 12.6.2026 tme 10:45: Sehe artikkâl ingressist já teevstâst ettui puástud, et Wikimedia Suomi -seervi pehti rähtih meid Wikipedia-artikkâlijd, mut servi tuárju meid sämikielâlijd Wikipediaid.
Tiivvum 12.6.2026 tme 10:45: Teevstâst ettui puástud, et Wikimedia Suomi rs lii servi, mon vyelni rijjâtátuliih ulmuuh rähtih Wikipedia-artikkelijd, mut Wikimedia Suomi rs lii servi, moin ohtsâšpargoost rijjâtátuliih ulmuuh rähtih Wikipedia-artikkâlijd.
