Gáregasnjárgga ássit leat jagiid áigge ovttas fuolahan bálvalandálu ássiid veadjimis iešguđetlágan skeaŋkkaiguin ja smávva doaluiguin, mat leat ordnejuvvon ássiid illun.
Gáregasnjárgga skuvlamánát fitne gieskat lávlumin juovlalávlagiid boarrásiidda. Dat bovttii máŋgasii ollu ráhkis muittuid mánnávuođas ja skuvlaáiggis.
Mánát ledje maid ráhkadan fiinna juovlakoarttaid ja láibon bihpporgáhkuid buot viesu ássiide.
Ulla Niittyvuopio illuda ovttas earáiguin go juovllat lahkonišgohtet.
– Gula, dat lea álo hui fiinna dovdu go juovllat lahkonišgohtet, dadjá Niittyvuopio.
Lagaš olbmot ja oahppásat galledit dávjá viesu ássiid. Go muhtin ássi fitne guossi, de lea dát guossi seammás maiddái buot eará ássiide.
Juovllaid lahkoneapmi oidno bálvalandálus máŋgga láhkai, galledeaddjit fitnet dávjjibut ja beaivvit leat muđuige earáláganat go dábálaččat. Juovlamuorra lea maid buktojuvvon sisa ja čiŋahuvvon.
Dál ovdal juovllaid skeŋkii Baišduoddára bálggus bohccobierggu bálvalandálu ássiide vai ássit besset borrat árbevirolaš biepmuid, maidda leat hárjánan jo mánnávuođa rájes. Bálvalandálus leat báikkálaš bargit, geat ráhkadit ieža biepmu das.
Ássit illudit go besset herskostallat árbevirolaš sámi biepmuin.
– Njuovčča ja bánit jorret doppe njálmmis go mun jurddašange bohccobierggu, dat lea goittotge min hersko. Dat lea duođai mii leat hárjánán dát lei iđitbeaivi, eahkedis dat lei ovtto min buoremus biebmu, dadjá Karin-Marja Rossi.
Karen Kitti lea ovtta oaivilis Rossiin.
– Bohccobierggus lea iešalddes iežas smáhkka. Dat lea earálágan go earát. Dan dovdá jo mállásisge, ahte mii biergguid lea, leago bohccobiergu vai ii. Dan dovdá go lea hárjánan borrat dan, Kitti dadjá.
Bálvalandálu hoavda Maria Jaakkola illuda go sámi kultuvra ja árvvut oidnojit divššárbarggus. Son sávvá, ahte ássit besset eallit iežaset erenoamáš eallima iežaset gielalaš ja kultuvrralaš birrasis.
Bálvalandálu ássit háliidit sávvat buohkaide buriid juovllaid. Maiddái don sáhtát sáddet dearvvuođaid Yle Sámi juovlasáddaga bokte. Dearvvuođaid ja sávaldagaid sáhtát sáddet dáppe.
